HURUNGATERANGI
Nā Hema, ko Tāwhaki, ka heke ko Wāhieroa, ko Te Ratatokerau, ko Hotunuku, ko Hotuope, ko Taungahautapu, ko Mawaketapu, ko Uruika, ko Rangitapu, ko Atuamatua ka moe ia Waiheketua ka puta ko Ngatoroirangi, nānā ko Tangihia, ko Tangimoana, ko Kahukuraarikinui, ko Tūhotoariki ka heke ko tona potiki ko Te Rangitakumu, nāna, ko Mawakenui, ko Mawakeroa, ko Mawaketaupo, ka puta ko Tuwharetoa ka moe ia Rangiuru, ka puta ko Tutanekai
Ka hoki atu kia Atuamatua ka moe ia Karika, ka puta ko Houmaitawhiti, ko Tamatekapua, ka puta ko Tūhoro-ma-tā-kaka ka rere ki muri ko Kahumatamomoe, nānā ko Tawakemoetahanga, ko Uenukumairarotonga, ko Rangitihi whakahirahira, ka moe ia Papawharanui, ka puta ko Tuhourangi, ka moe ia Rakaitahaenui, ka puta ko Taketakehikuroa, ka heke ko Umukaria, ka moe ia Hinemaru ka puta ko Hinemoa,
Ka moe Hinemoa kia Tutanekai, Ka puta ko Whatumairangi; Ka moe a Whatumairangi i a Marūteao; Ka puta ko Hurungaterangi ka rere ki muri ko Ariariterangi, ka moe a Hurungaterangi ia Whaingarangi ka puta ko Te Ohu.
Ko Pūhaorangi, ko Ohomairangi, ko Ruamuturangi, ko Taungahautapu, ko Mawaketapu, ko Uruika, ko Rangitapu, ko Atuamatua, ko Houmaitawhiti, ko Tamatekapua, ka puta ko Tūhoro-ma-tā-kaka ka rere ki muri ko Kahumatamomoe, nānā ko Tawakemoetahanga, ko Uenukumairarotonga, ko Rangitihi whakahirahira, ka moe i a Papawharanui, ka puta ko Tuhourangi, ka moe ia Rongomaipapa, ka puta ko Uenukukopako, ka heke ko Whakauekaipapa.
Oranga Whānau
E whā aua whakatipuranga, ko ngā tipuna, ngā matua, ngā tamariki me ngā mokopuna. Ko te arohanui o te whānau, tētahi ki tētahi, nāna i here ai ngā whakaaro, ngā tikanga me ngā mahi kia ora ai te katoa o te whānau. Ko te ora o te whānau te mea nui. Nā, ngā kaupapa a te kāwanatanga i wehe ai ngā whānau i uaua ai te noho ā whānau, i waimeha ai te mana o te whānau ki te tiaki i tōna katoa.
Koia te wā i riro mā ngā mātua anake ā rāua tamariki e whakatipu. Kua tawhiti rawa ngā tīpuna me te rahinga o te whānau. Rātou i kaha ki te kuhu i a rātau, i ora pai. Rahi tonu rātau i patua e te raruraru, kīhai i ora pai.
Nā tōna whakapapa, me ōna tīpuna he mana nui tō te whānau nōna ake, he kaha nui hoki tōnā mehemea ka whakakotahi rātou i a rātou mō tētahi kaupapa. He kaupapa nui te mauriora o ngā tamariki, ngā taiohi, ngā pakeke me ngā kōeke o te whānau. Inā whakaae te whānau māna tonu e whakatakoto tā rātau kaupapa mauriora me ngā ūara hei arataki i a rātou, kei whea mai tēnā. He mahi tino rangatira te waihanga kaupapa mauriora mō te whānau hei whai mā katoa e tū pakari ai taua whānau.
Kura Tuatahi Rā Whakanuia
Ko te manu kai i te miro nōna te ngahere
Ko te manu kai i te matauranga nōna te ao
Whainga 1: Tautoko ai te whānau i ngā mahi kura a ngā tamariki mokopuna. He mea nui te whai i ngā matauranga o te ao me te whakawhanake i te katoa i roto i ngā kura wānanga me ngā mahi.
Whainga 2: Hokihoki tonu ai te whānau ki ōna marae, ki tōna papa kāinga. Āwhina ai te whānau i ngā kaupapa o ōna marae. Kaha rātau ki te kōrero Māori, kaha hoki ki te pupuri i ngā tikanga o te marae, o te noho ā-whānau, me te tiaki pai i te katoa.
Whainga 3: Ko te whānau arotahi ki te ora o te katoa, e kaha ana ki te whakatutuki i ā rātou kaupapa mauriora, koia te whānau ka tae ki te taumata o te ora e tū rangatira ai rātou.
Whainga 4: Kawe ai te whānau i ngā tikanga o te tua, te tohi me te pure. Aro ai te whānau ki ngā tikanga e piki ai te mauriora o te katoa, ā tinana, ā wairua hoki.
