TE ARAWA E...E..KO TE WHAKAARIKI KO TE WHAKAARIKI TUKUA MAI KIA PIRI TUKUA MAI KIA TATA KIA EKE MAI...KI RUNGA KI TE PAEPAE POTO A HOUMAITAWHITI..HI

Ko Moerangi te Maunga

Ko Puarenga te awa

Ko Rotorua-nui-a-kahumatamomoe te moana

Ko Ngati Hurungaterangi te hapu

Ko Ngati Whakaue te Iwi

Ko Te Arawa te Waka

Ko Hurungaterangi te Marae

TE KURA KAUPAPA MĀORI O HURUNGATERANGI

Kia takatū tahi tātou......

I timata Te Kura Kaupapa Māori o Hurungaterangi i te tau 1997. Nā runga i te whakaaetanga o Koro Eria Moke. I whakaae hoki te haukainga o Hurungaterangi marae kia whakatū i te kura ki te wharekai tāwhito rā. E whā tau te roa o tō mātou noho atu ki reira. I te tau 2005 i hunuku mai i te marae o Hurungaterangi ki te kura takawaenga tawhito o Tō te Rā. I whakaae mai ngā kaumatua i runga i tō rātou mōhio nā Ngāti Hurungaterangi te mana whenua i mua rānō. Tae mai ki ēnei rā, kua tekau ,ā rua tau mātou e noho ahikā ana ki te whenua nei, e whitu tekau ngā tamariki o te kura tuatahi, e tekau mā iwa ngā akonga o te Wharekura, ā, e rima tekau mā whā ngā whānau o te kura nei.

Hei te mārama o Paengawhawha 2020 ka huri hai kura arongatahi.

Ko te wawata o te whānau mō Te Kura Kaupapa Māori o Hurungaterangi; kia noho ahikā ki te whenua o Mangakākahi ka tahi, ka rua kia rere whānui te rerehua me te kōunga o te reo Māori. Ka mutu, ko tā mātou wawata nui, ā tōnā wā, ka rere kau ko te reo māori ki te whānuitanga o te whenua nei- ki te hāpori tae rawa atu ki te taiao huri noa i ngā tamariki.

Kura Tuatahi Whakataetae ā Motu

Ko te manu kai i te miro nōna te ngahere

Ko te manu kai i te matauranga nōna te ao

Whainga 1: Ko te ngakau te mata me te kuaha o te wairua, otira ko te whiu o te kupu, ko te wero ko te riri, ko te aroha, ko te humarie, me ēnei āhuatanga katoa he mea kuhu ki te ngakau titi tonu ki te wairua. Koia nei te timatanga o te kōrero 'kia ngakau mahaki'. Ma tēnei hoki ka tika te kōrero 'He oranga ngakau he pikinga waiora'.

Whainga 2: Ko Te Aho Matua te tauihu o te waka, te waka e hoea nei e ngā whānau kia āwhina, kia tūtuki i ngā manako katoa.

Whainga 3: Ko ngā āhuatanga ako katoa he mea mahi i roto i te koanga ngakau, me te whakahihi hinengaro.

Whainga 4: E tika ana kia tū whakahihi te tamaiti i roto i tōnā ake iwi, ēngari kia whai koha anō ki ngā iwi katoa.

Whainga 5: Kia tipu te mīharo ki ngā ora, ki ngā mea tupu katoa. Kia kāua e tukinotia.

Whainga 6: Kia tupu ngā āhuatanga tuku iho o tona pūmanawa ki ngā tihi teitei o ngā taumata.